Fryske Krite Bûtenpost
Bêste toanielfreonen,
Jubileumútfieringen Kritetoaniel Bûtenpost.
Op 24 maart 2012 bestiet it Kritetoaniel op’e kop ôf 90 jier. Alle reden om de flagge út te stekken en mei hiele moaie produksjes foar de dei te kommen. De jongerein hat al op in bysûndere wize de ôftraap dien fan it jubileumjier 2012. Hja hienen in soad súkses mei harren Wâldkeninginne yn jannewaris. Op sneontejûn 17 maart, 20.00 oere, en op sneintemiddei 25 maart, 15.30 oere, spilet de “âlderein” it stik “Twa” (Two) fan Jim Cartwright yn in Fryske oersetting fan Romke Toering. Tryater hat yn it ferline in soad súkses hân mei it stik. Wienen it doe Jan Arendz en Klaasje Postma dy’t tegearre alle rollen spilen, Twa dus, no binne der in lytse 20 man/frou yn tou.
Koarte ynhâld. It stik spilet oan de taap fan in doarpsherberch earne op it Fryske plattelân. Ornaris is it in rêstich kafee mei gemiddeld sa'n seis, sân klanten. Drokte is der mei de jierlikse toanieljûnen en fansels mei de merkedagen. Freed- en sneontejûn wurdt der oanstutsen troch de jongerein, dy't nei tsienen syn heil fierderop siket. Mar der binne ek jûnen dat de doar al om healwei tsienen op slot giet. Jûn is it lykwols ûnferwacht tige drok. It rint de kastlein en it kastleinske Klaas en Jantsje van der Zee-Sikkema suver wat oer de fûst.
Kaartferkeap.
Leden, hja ha rjocht op twa kaarten, kinne fan sneon 3 maart ôf kaarten keapje, wylst fan sneon 10 maart ôf ek net-leden kaarten besette kinne. De spyldata binne sneontejûn 17 maart en sneintemiddei 25 maart. Mochten der nei de foarferkeap noch kaarten beskikber wêze, dan binne dy op de jûn of middei fan de útfiering oan de seal te keap.
Italiaansk Buffet.
Nei ôfrin fan de útfiering fan sneintemiddei 25 maart stiet der dus foar de leafhawwer fan ite oer
de grins wer in Italiaansk Buffet op it program. Wa’t dielnimme wol oan dizze iterij kin hjir foar in
kaart besette by Hedera Blommen. De tagong foar it buffet is 15 euro de man/frou. Oant uterlik
woansdei 21 maart kinne dizze kaarten helle wurde.
De rolferdieling:
Klaas van der Zee Lourens de Zee
Jantsje van der Zee-Sikkema Frouke Holtrop
Sjonny Roosjen Andre de Zee
Anita Boonstra Iris Kloosterman
Jet Ledinja Bianca Wiersma
Kees Jaarsma Reinold Paauw
Monica Brauw Rita Wijnsma
Harke Hoekstra Okko Jan Pietersma
Faiky de Jong Amarens de Vries
Wullum Ferwerda Remco de Poel
Gerke van Elst Foppe de Vries
Tryn van Elst Sjoukje Wiersma
Maaike de Groot Bianca Wiersma
Pieter Sybren de Haas Lieuwe Paauw jr.
De Haas Reinold Paauw
Rezjy Tineke Broers
Ynstekster Gryt de Poel
Grime Diete Paauw
Lûd en Ljocht Ruurd Holtrop en Sieger de Vries
Dekor Harrie
Nieuwenhuis, Foppe de Vries,
Menze Stiksma en Oeds van der Ploeg
Fryske Krite Bûtenpost syket jong talint..!!
Sa as jim sjen kinne is der in soad te sjen en te lêzen op dizze side. Wy sille besykje om de side sa goed mooglik by te hâlden mar as jimme oanfollings hawwe dan hearre en sjogge wy it graach. Under it kopke reaksjes kinne jimme fan alles kwyt; reaksjes oer de stikken, oer de side of oer oare saken dy't jimme kwyt wolle. Stadichoan sil der mear op de side komme dus jim kinne sa no en dan wêr efkes op de side sjen en dan sille jim wêr neie dingen ûntdekke. Sa besykje wy ek âlde saken te finen dy't wy graach yn de Alde Doaze sette wolle. Mei oare wurden, as jimme aardige âlde foto's, ferhalen of anekdoates witte, dan sjogge wy dy graach ferskinen en wy sette se op ús eigen webside.
Wy hoopje dat jimme in soad wille oan dizze side belibje sille.
Groetnis,
It bestjoer
